Romana superstitio

de Wipone esse fertur

ca. 1045

________________________________________________________________

Romanum adulterium      destruet imperium:

papa sedet super papam      et contra legem sacram

nupta est tribus maritis      unica Sunamitis.

5

Sponsa dei violatur,      quae inique tractatur,

iniquos habet haeredes      apostolica sedes.

Propter aurum et argentum      hoc malum est inventum,

de matre avaritia      nascuntur haec vitia.

Sede modo, rex Henrice,      omnipotentis vice,

10

destrue hoc connubium      triforme et dubium,

ne patiaris confundi      quattuor plagas mundi!

Serpit hoc maleficium      mox in pontificium,

ad omne sacerdotium,      si habebit otium;

sic de capitali morbo      minor languescit ordo.

15

Non quisquam adulterorum      Romanum regat thorum,

aliquis papa quaeratur,      quid dignus habeatur,

et tunc plus valebit ille      quam huius modi mille.