Sacramentarium Gregorianum

_________________________________________________________

63.

Feria v ad sanctum Siluestrum

Praesta quaesumus omnipotens deus, ut quos uotiua ieiunia castigant, ipsa quoque deuotio sancta laetificet, ut terrenis affectibus mitigatis facilius caelestia capiamus: per.

Super oblata. Purifica nos misericors deus, ut ecclesiae tuae preces, quae tibi gratae sunt pia munera deferentes, fiant expiatis mentibus gratiores: per.

Ad completa. Caelestia dona capientibus quaesumus domine non ad iudicium peruenire patiaris, quod fidelibus tuis ad remedium prouidisti: per.

Super populum. Populi tui deus institutor et rector, peccata quibus inpugnantur expelle, ut semper tibi placitus et tuo munimine sit securus: per.