Anticlaudianus sive

De officiis viri boni et perfecti

1182/83

___________________________________________________

Prologus metricus

Autoris mendico stilum falerasque poete,

Ne mea segnicie Clio directa senescat,

Ne iaceat calamus scabra rubigine torpens.

Scribendi nouitate uetus iuuenescere carta

5

Gaudet, et antiquas cupiens exire latebras

Ridet, et in tenui lasciuit harundine musa.

Fonte tuo sic, Phebe, tuum perfunde poetam,

Vt compluta tuo mens arida flumine, germen

Donet, et in fructus concludat germinis usum.