Medea

___________________________________________________________

Chorus quartus

[Chorus Corinthiorum Medeam observans.]

Chorus:

Quonam cruenta maenas

850

praeceps amore saevo

rapitur? quod impotenti

facinus parat furore?

vultus citatus ira

riget et caput feroci

855

quatiens superba motu

regi minatur ultro.

quis credat exulem?

flagrant genae rubentes,

pallor fugat ruborem.

860

nullum vagante forma

servat diu colorem.

huc fert pedes et illuc,

ut tigris orba natis

cursu furente lustrat

865

Gangeticum nemus.

frenare nescit iras

Medea, non amores;

nunc ira amorque causam

iunxere: quid sequetur?

870

quando efferet Pelasgis

nefanda Colchis arvis

gressum metuque solvet

regnum simulque reges?

nunc, Phoebe, mitte currus

875

nullo morante loro,

nox condat alma lucem,

mergat diem timendum

dux noctis Hesperus.